Ħarsa ġenerali:

L-Uffiċċju ta’ Koordinazzjoni tat-Trattament barra minn Malta huwa bbażat fl-Isptar Mater Dei, fil-Blokk Amministrattiv. L-għan ta’ dan l-uffiċċju huwa li jikkoordina l-proċedura ġenerali li tinvolvi l-Programm Nazzjonali Speċjalizzat Ħafna ta’ Riferiment Barra minn Malta. Barra minn hekk dan l-Uffiċċju huwa responsabbli għall-koordinazzjoni u l-arranġamenti loġistiċi fir-rigward ta’ kliniċi u proċeduri kirurġiċi fl-Isptar Mater Dei mwettqa minn konsulenti barranin li jżuru l-isptarijiet f’Malta.

L-Uffiċċju tal-Uffiċjal Mediku Ewlieni qiegħed kontinwament jwettaq studji ta’ probabbiltà biex jevalwa liema servizzi jistgħu jiġu introdotti fl-Isptar Mater Dei permezz ta’ żjarat regolari minn konsulenti li jżuru pajjiżna.

Numru ta’ Konsulenti mir-Renju Unit u Sqallija minn oqsma ta’ speċjalizzazzjoni differenti jiġu mistiedna regolarment kull sena biex iwettqu kliniċi u proċeduri kirurġiċi fl-Isptar Mater Dei. Permezz ta’ dawn iż-żjarat, numru ta’ pazjenti ma jkollhomx bżonn li jivvjaġġaw lejn ir-Renju Unit għall-kura peress li dan jkun se jiġi offrut f’Malta. Dawn iż-żjarat mhux biss iservu biex itaffu l-piż tal-ivvjaġġar għall-pazjenti u l-qraba tagħhom iżda jservu wkoll bħala kuntatt siewi għall-Professjonisti tas-Saħħa lokali.

Permezz ta’ dawn iż-żjarat il-Ministeru għas-Saħħa jfittex li jsaħħaħ ir-relazzjonijiet bejn l-Isptar Mater Dei u l-isptarijiet barranin.

Kif jista’pazjent jiġi ttrattat minn Konsulent Viżitatur Barrani?

Il-konsulenti lokali huma f’kuntatt mill-qrib mal-konsulenti viżitaturi barranin biex flimkien jikkoordinaw il-kura tal-pazjenti. Meta jkunu magħrufa d-dati meta l-konsulenti se jżuru, dawn jiġu kkomunikati lill-konsulenti lokali biex iħejju l-listi ta’ pazjenti li għandhom jattendu l-kliniċi. Matul dawn il-kliniċi, il-konsulenti barranin ifasslu l-lista ta’ pazjenti li jkollhom bżonn kirurġija barra minn Malta u dawk li jistgħu jiġu kkurati lokalment.

M’hemm l-ebda referenza diretta għall-kliniċi tal-konsulenti viżitaturi. Il-pazjenti jridu jkunu taħt il-kura ta’ Konsulent tal-Gvern lokali li jirreferi lill-pazjent lill-konsulenti li jkunu qed iżuru meta jitqies li jkun meħtieġ. Il-konsulenti lokali għandhom ikunu fl-istess speċjalità tal-konsulent viżitatur.

Jinżamm kuntatt kontinwu bejn konsulenti lokali u konsulenti viżitaturi biex tiġi aċċertata l-kontinwità tal-kura.